(Muqdisho, Isbahaysi) Intiina la socotay qoraaladii hore een ka samaynay musuqa iyo qaraabo kiilka ragaadiyay Dowladda Madaxweyne Xasan Sheikh, waxaan soo bandhignay beegsiga lagu hayo dad gooni ah, gaar ahaan waxaan sadex maalin ka hor daabacnay caddaymo la xiriira afar Diblumaasi oo reer Puntland ah oo maalmo kooban gudahood shaqada laga cayriyay, taas oo dad badan ku abuurtay kalsooni darro ay dowladdooda ku qabaan, maadaama ay muujisay inaysan muwaadiniinta Soomaaliyeed dhex u wada ahayn.
Warbixintan cusub waxaan ku soo bandhgaynaa afar kale oo isku reer ah oo labo ka mid ahi yihiin raaska hoose ee Madaxweynaha, halka labada kalena la wadaagaan haybta guud, waxaana afarta Diblumaasi ee cusub la magacaabay isla maalmaha shaqada laga joojiyay afartii Diblumaasi ee isku reerka ahaa.
Baaritaan ay samaysay Shabakadda Isbahaysi waxay ku ogaatay in marka laga tago qaraabo kiilka iyo qabyaaladda ku dhex jirta sheekadan cusub ay magacaabistani ka soo horjeeddo sharciga siyaasadda arrimaha dibadda dalkeenna oo qeexaya in Diblumaasiga dibadda loo dirayo uu labo sano ka dhex shaqeeyo xarunta wasaaradda.
Labo ka mid ah afarta Diblumaasi weligood kama shaqayn wasaaradda iyo Diblumaasiyadda midna, halka labada kalena la isugu daray dalacsiin iyo wareejin xilli Diblumaasiyiintii ay isku wakhtiga ahaayeen dalka gudihiisa lagu soo celinayo.
