Maalmahan Madaxtooyada Dawladda Federaalka Soomaaliya, waxaa ka taagan Jaah wareer xoog leh oo ku saabsan dhanka maamulka Xafiiska Warfaafinta Villa Somalia, Agaasimaha Guud ee Madaxtooyada ayaa 20-kii bishan Ogosto soo saaray wareegto uu xilka kaga qaaday Agaasimihii Xafiiska Warfaafinta Cabdiqaadir Cali Dige, halka uu u magacaabay xilkaas Cabdiraxmaan Xusayfi.
Cabdiqaadir Dige ayaa ku gacan sayray amarka uu xilka uga qaaday Agaasimaha Guud Mudabe Cabdixakiin Yuusuf, sidoo kale Dige wuxuu ganafka ku dhuftay in uu xilka ku wareejiyo Agaasimaha cusub ee magacaaban.
Wuxuu sidoo kale, ku tallaabsaday arrimo dhawr ah oo ceeb ku ah hanaanka kala danbaynta shaqo ee xarunta dalka looga taliyo ee Villa Somalia, isaga oo dhammaan shaqaalihii farsama yaqaanka ahaa ee Xafiiska Warfaafinta ka saaray page-ka Facebook ee Villa Somalia, isaga oo kaliya ayaana maamulka baraha bulshada isku koobay.
Agaasimaha Guud ee Villa Somalia, mudane Cabdixakiim Yuusuf oo aad uga carooday tallaabadan amar diidada ah ee uu ku kacay Agaasima Waaxeedka xilka laga qaaday ayaa tallaabadan gaarsiiyey Madaxweyne Xasan Sheekh, isaga oo wacad ku maray haddii aan loo hoggaansamin awaamiirta iyo kala danbaynta shaqo ee Xafiiska Agaasimaha Guud uu xilka uu Villa Somalia u hayo iska casilayo.
Waa markii u horaysay taariikhda Madaxtooyada Soomaaliya ee shaqaaluhu u hoggaansami waayaan wareegtooyinka ka soo fula xafiiska Agaasimaha Guud ee madaxtooyada, sidoo kale wali ma dhicin taariikhda Agaasime Waaxeed, xilka laga qaaday oo xoog ku jooga xafiiskii shaqadiisa laga fanishay.
Warbaahinta kala duwan ee Caasimadda ka hawlgala ayaa si adag u diidan Agaasime Dige, kaas oo ay ku eedaynayaan in uu cadaadis joogta ah ku hayo saxafiyiinta Soomaaliyeed ee uu xafiisku adeegga u qaban jiray. Waxay kale oo ku eedeeyeen in uu qabyaalad iyo nin jeclaysi ku kala dhawaysto warbaahinta.
