Ankara (Isbahasyi) – Dawladda Itoobiya ayaa dadaal aan kala joogsi lahayn ugu jirta hardanka diblomaasiyadeed ee kala dhexeeya Soomaaliya, iyada oo ku qancisay Madaxwayne Xasan Sheekh in uu yimaaddo miiska wada-hadalka, iyadoo Itoobiya aysan si rasmi ah uga laaban heshiiskii ay la gashay Hargaysa.
Ra’iisul Wasaaraha Itoobiya Abiy Axmed ayaa natiijo wanaagsan ka helay xeeladaysi diblomaasiyadeed oo uu ku dayey Dalka Turkiga, kaddib markii uu Madaxwaynaha dalkaas Racep Tayyip Erdogan 8-dii bishii May u diray wafdi ergo ah oo ka kooban Madaxweynihii Hore ee dalkaas Mulatu Teshome Wirtu – sidoo kalena safiirro Itoobiya uga soo ahaa dhawr dal oo ay ka mid yihiin Turkiga, Jabbaan, Shiinaha iyo Asarbayjaan, iyo Wasiirka Arrimaha Dibadda Itoobiya Taye Atske Selaissie.
Madaxwaynaha Turkiga oo qaabbilay ergada Itoobiya, ayaa la qaatay arrinta dhex-dhexaadinta, isaga oo hoosta ka xarriiqay in uu wafdi u dirayo dhanka Soomaaliya si ay farriinta Itoobiya u gaarsiiyaan Madaxwayne Xasan Sheekh.
Warbaahinta Isbahaysi, oo xog ka heshay ilo ku dhowdhow Villa Somalia, ayaa ogaatay in Madaxweyne Xasan Sheekh Maxamuud uu Madaxtooyada ku qaabilay ergay Turki ah oo waday farriintii dhex-dhexaadinta, taas oo uu si weyn u soo dhoweeyey Madaxweynuhu.
Ergada Turkiga ah ayaa la laabtay natiijo aysan filanayn oo muujinaysa sida Villa Somalia ay ugu hanqal taagaysay xiriirka Itoobiya, balse shardiga Madaxweyne Xasan Sheekh uu ku xiray ayaa ahaa in dowladda Turkigu ay hoggaamiso wada-hadallada labada dhinac.
Turkiga oo saaxiib la ah labada dal ayaa aqbalay dhexdhexaadinta, waxaana haatan socda qaban qaabada kulammo qarsoodi ah oo labada dowladood ku dhex mari doona Turkiga.
Sida la wada ogsoon yahay, Dowladda Federaalka Soomaaliya ayaa bishii Febraayo ee sanadkan la gashay Dowladda Turkiga heshiis difaac oo uu Turkigu ku ilaalinayo badaha Soomaaliya, isla maarkaasna uu dib-u-dhis ku samaynayo Ciidamadii Badda ee Soomaaliya.
Muddadan waxaa la dareemayey dhaqdhaaqa xooggan oo Wasaaradda Arrimaha Dibadda Itoobiya ay ku iibinayso heshiiska ay la gashay Somaliland, iyadoo Safaaradahooda muhiimka ah ee caalamka ay ku leedahay Itoobiya ay si cad u iib geynayeen heshiiska ay quursadeen shacabka iyo dawladda Soomaaliyeed.
Firfircoonida iyo halganka diblomaasiyadeed ee Itoobiya waxaa barbar socota in Wasaaradda Arrimaha Dibadda Soomaaliya ay fadhiid ka noqotay difaaca qadiyadda ugu weyn ee hortaalla, halkii laga filayeyna in ay ka daba-tagto jahwareerka iyo been abuurka Itoobiya ay ka fidinayso heshiiskaasna waxaa muuqata in Wasiirka cusub ee laga soo wareejiyey Wasaaradda Arrimaha Gudaha uu wali la nool yahay shaqadiisii hore ee gudaha dalka.
