RAASKAANBOONI (ISBAHAYSI) — Dagaal xooggan oo u dhaxeeya ciidamadii ay dhowaan Dowladda Federaalku gaysay Raaskaanbooni iyo ciidamada Jubbaland ayaa saaka ka qarxay deegaanka Oodow oo ka tirsan degmada Badhaadhe ee gobolka Jubada Hoose.
Xog rasmi ah lagama hayo dagaalka maadaama khadka isgaarsiintu uu ka go’anyahay deegaanka, laakiin labada dhinacba waxay sheeganayaan wax loogu yeeray guul dagaal.
Lama xaqiijin waxa soo dedejiyay isku dhaca saaka bilowday, laakiin labada dhinacba maalmihii la soo dhaafay waxay u diyaar garoobayeen dagaal.
Cidna weli xog rasmi ah ma soo saarin, iyada oo wararku sheegayaan in weli dagaalku uu socdo, waxaana qaar ka mid ah indheer-garadka bulshadu ay farriimo ku saabsan in dagaalka la joojiyo iyo baaqyo nabadeed ay ku baahinayaan baraha Bulshada.
