New York, (Isbahaysi) – Ku-simaha Danjiraha Qaramada Midoobey u jooga Soomaaliya Danjire James Swan ayaa warbixintiisii ugu horreysey tan iyo markii dhowaan la soo magacaabay, waxa uu ka jeediyey fadhiga Golaha Ammaanka Qaramada Midoobay uga hadlayeen xaaladda Soomaaliya.
Danjiraha oo ka hadlay xaaladda siyaasadeed ee dalka ayaa sheegay in wax-ka-beddelkii lagu muransanaa ee Dastuurka ku-meel-gaarka ah aanu ahayn mid loo dhan yahay, isaga oo tilmaamay in ay ka maqnayd Dowlad Goboleedka Puntland, halka siyaasiyiinka mucaaradka ahi ay sidoo kale qaadaceen tallaabadan wax-ka-beddelka Dastuurka.
“Intii u dhaxaysay bilihii Febraayo iyo May, Baarlamaanka Federaalka ayaa ansixiyay wax ka beddelka afarta cutub ee ugu horreeya ee Dastuurka KMG ah ee 2012. Wax ka beddelkaas oo ku saabsan arrimo kala duwan oo ay ka mid yihiin, qaab-dhismeedka dowladnimada iyo hannaanka doorashooyinka dalka. Qaar ka mid ah siyaasiyiinta mucaaradka iyo mas’uuliyiinta Puntland ayaa ka soo horjeestay habka loo maray wax-ka-beddelka dastuurka iyo natiijada labadaba.” Ayuu yiri Danjire Swan
Sidoo kale, Danjiraha oo Golaha Ammaanka ee Qaramada Midoobay ka hor xusay qaraarkii ay Dowlad Goboleedka Puntland ku shaacisay inay ka baxday Nidaamka Federaalka ah ee dalka inta heshiis dhammaystiran laga gaarayo dhammaystirka dastuurka, ayaa hoosta ka xarriiqay inay muhiim tahay in heshiis ku dhisan wadar-oggol ay dhammaan deneeyeyaashu ka gaaraan tallaabooyinkan muhiimka u ah dowlad-dhiska Soomaaliya.
Ugu dambayn, Ku-simaha Danjiraha Qaramada Midoobey u jooga Soomaaliya Danjire James Swan, ayaa ugu baaqay dhammaan daneeyayaasha siyaasadda Soomaaliyeed inay si wadajir ah uga shaqeeyaan xallinta khilaafka dhexdooda ayna is-afgarad ka gaaraan arrimaha taagan.
