Muqdisho, (Isbahaysi) – La-taliyaha Amniga Qaranka ee Xafiiska Madaxweynaha Xuseen Macallin ayaa maanta qoraal uu bartiisa X (Twitter) ku baahiyey ku sheegay in aysan jirin wax hadal ah oo ay xilligan dowladda Soomaaliya kula jirto argagixisada Alshabaab.
La-taliyaha ayaa tilmaay in wadahadalka Alshabaab uu ku xiran yahay inta ay ka fulinayaan shuruudihii Madaxweynuu hor dhigay ee ahaa inay ka beri noqdaan xiriirkooda kooxaha argagixisada caalamiga ah, ayidaan midnimada dhuleed ee Jamhuuriyadda Soomaaliya iyo inay ajendahooda siyaasadeed u maraan dhabbe nabdoon.
Beeninta Dowladda ayaa ku soo beegmaysa iyada oo toddobaadkan si weyn uu Soomaalida dhexdeeda ugu faafeen warar sheegaya in wada-hadal uu u furmayo Dowladda Federaalka Soomaaliya iyo argagixisada Alshabaab.
Waxaa hadal-haynta arrinkan si weyn looga dareemay baraha bulshada iyo warbaahinta Soomaalida, iyada oo ay qaar ka mid ah siyaasiyiinta Soomaaliyeed si toos ah uga hadleen arrinkan.
“Wadahadalka la sheegay in kooxda argagexisada Alshabaab lala gelayo waa in aysan noqon khudbosir qof kaligii go’aansado. Waa in lagu wajaho talo qaran oo loo dhanyahay, shacabka wakiilka laga yahayna si daahfuran loola socodsiiyo.” Ayuu yiri Cabdiraxmaan Cabdishakuur Warsame oo ka hadlay arrinkan
Inkasta oo ay Dowladdu hadda beenisay wadahallo socda, misna marnaba meesha kama aysan saarin wadahallo furmi kara mustaqbalka, iyada oo Madaxweyne Xasan Sheekh intii uu ku sugnaa dalka Norwey uu carrabka ku dhuftay in dowladdiisu ay diyaar u tahay wadahadal lala galo Alshabaab haddii ay dhinacooda diyaar ka noqdaan, cid walba oo Alshabaab wadahadal ku qancin karaysana uu doorkaasi u furan yahay.
Dhanka kale, ma jiro wax war ah oo ka soo baxay dhanka Alshabaab, iyaga oo hore marar badan u sheegay inaysan wax wadahal ah la galayn Dowladda Federaalka Soomaaliya.
