Muqdisho, (Isbahaysi) – Golaha Wasiirrada Xukuumadda Federaalka Soomaaliya ayaa kulankoodii khamiislaha ahaa ee maanta ku ansixiyey qaraar ku saabsan Khataraha Qaranka ee halista galinka kara jiritaanka, dowladnimada, midnimida dalka iyo wadajirka dadka Soomaaliyeed.
Dowladda ayaa markii koowaad u aqoonsatay aragtida goonni-goosadka ah ee Somaliland khatar qaran, iyada oo lagu calaamadiyey halista koowaad ee dalka ka dib khatarta argagixisada.
Tan ayaa ka dhigan in hay’adaha dhawra amniga qaranka ee dalku ay tallaabo ka qaadi karaan cid walba oo ku kacda ama taageero u muujisa dhaqdhaaq walba oo xambaarsan aragtiyo goonni-goosad ah.
Khataraha kale ee haliska ku ah dalka ee qaraarkan ku soo baxay ayaa lagu sheegay argagixisada, dowlad-nugeylka, xuduudaha beylahda, faragelinta shisheeye, isbeddelka cimilada, khatarta tiknoolajiyadda iyo khataraha bulshada.
Tallaabadan oo ah mid ay dad badani soo dhoweeyeen ayaa shacabka Soomaaliyeed waxa ay dhawrayaan sida ay dowladdu u dhaqangaliso, iyada oo la ogyahay in maamulka Somaliland ee ah kan keliya ee aamminsan aragtida goonni-goosadka marar badan laga dhex difaaco goleyaasha qaran ee dowladda.
Dhanka kale, Qaraarkan ayaa kusoo beegmayaa xilli la hadal hayo in Madaxweynaha Maamulka Somaliland Muuse Biixi uu dhowaan Addis Ababa u aadayo dhaqangelinta is-garadkii sharcidarrada ahaa ee badda.
