(Muqdishi, Isbahaysi) Kalfadhiga shanaad ee baarlamaanka 11-aad ayaa ku furmay si taxadar, kala shaki, iyo hubanti la’aan isugu jirta. Habka ay Xildhibaannadu u soo dhoweeyeen Madaxweyne Xasan Sheekh oo kalfadhiga furayay ayaa dareenkooda muujinaysay, habacsanantii lagu qaabilay Madaxweynaha iyo marxa`bayn la’aanta oo caado iska ahayd kalfadhiyadii hore.
Madaxweynaha iyo Xildhibaannada waxaa isugu laaban xisaabaad fara badan oo aan weli la dejin xaasilkeeda, waxaana muuqata in Xildhibaano badan ay Madaxweynaha la galeen heshiisyo aan sharci ahayn oo ay kaga badesheen gacan taagga afartii cutub ee dastuurka laga beddelay.
Fulin la’aanta heshiisyadii Madaxweynaha iyo Xildhibaannada, xil-gudasho la’aanta xukuumadda, saansaanta nooca doorasho ee la aadayo, qabyo tirka dastuurka, iyo kala furashada Villa Somalia iyo madaxda Dowlad Goboleedyada oo u muuqata mid shinkeedii joogta ayaa xiiso iyo xamaasad dheeraad ah u yeelaya kalfadhigan.
Waxaa kale oo cadhada baarlamaanka cirka ku sii shareeray markii la hor keenay gudiga joogtada ah 16 sharci oo Xafiiska Raisul Wasaaruhu soo gudbiyay looguna talo galay in lagu mashquuliyo Xildhibaannada si aysan shaqadooda la xisaabtanka u gudan.
Xeel-dheereyaashu waxay leeyihiin kalfadhigan waa kala bayr oo baarlamaanka ayaa awooddiisii soo ceshan doona oo xukuumadda la xisaabtami, talo ku yeelan go’aamada siyaaseed ee dalka ama wuxuu noqon mid sii daciifa oo haybaddiisu lunto oo aan qadiyadaha taagan waxba laga waydiin, waxaana suurtagal ah inay kala qaybsamaan oo labo guddoon iyo labo baarlamaan noqdaan sidii la ahaa markii ugu danbaysay ee Aadan Madoobe ahaa la-guddoomiye.(Co-Speaker).
Wax walba waxay ku xiranyihiin siduu yeelo Guddoomiyaha Baarlamaanka oo la tuhunsanyahay inuu xukuumadda u galay, haddii uu oday u noqdo aqalka doortay oo shirarkooda u guddoomiye, dhinaca ay u bataan ugu guddoomiyo, waxaa muuqata rajo uu ku sii jiri karo baarlamaanku kuna sii wadan karo shaqadiisa, haddiise uu Gudoomiyuhu sida kale yeelo oo amarrada laanta fulinta ku sii shaqeeyo waxaa la dhaxli doonaa baarlamaan kala qaybsan oo wakhtigu ka dhamaado isagoo Warbaahinta waraaqo isku dhaafsada.
