Juun 03, 2024
Shabakadda Warbaahinta Isbahaysi waxay codkeeda ku biirinaysaa Warbaahinta iyo Suxufiyiinta Soomaaliyeed ee ka hadlay tacaddiyada iyo xadgudubyada ka dhan ah Warbaahinta ee Dowladda Federaalka Soomaaliya ay kula kacayso Warbaahinta, Tacaddiyadaasi oo ay ka mid yihiin cunaqabatayn dhanka xogta ah iyo cadaadis joogto ah oo la saarayo warbaahinta madaxbannaan.
Warbaahintu waxay xaq u leedahay in ay si xor ah oo aan cabsi lahayn u gudato waajibaadkeeda warbaahineed, sida ku cad qodobbada 18-aad iyo 22-aad ee Dastuurka Jamhuuriyadda Federaalka Soomaaliya.
Shabakadda Warbaahinta Isbahaysi waxay ka walaacsan tahay in warbaahinta lagu hayo cunagabatayn aan caadi ahayn iyo kala ququb bahda Warbaahinta, taas oo si gaar ah u saameynaysa xorriyadda hadalka iyo madaxbannaanida saxaafadda.
Shabakadda Warbaahinta Isbahaysi waxay ugu baaqaysaa Dowladda Federaalka Soomaaliya in ay ixtiraamto dastuurka dalka, gaar ahaan qodobada la xiriira xorriyadda hadalka, dimuqraadiyadda iyo madaxbannaanida warbaahinta.
Waxaa naga go’an inaan difaacno xorriyadda hadalka iyo madaxbannaanida warbaahinta, si shacabka soomaaliyeed ay u helaan warar xaqiiqo ah oo dheelitiran.
Dhammaad
Shabakadda Warbaahinta Isbahaysi
