Muqdisho, (Isbahaysi): Shabakadda Isbahaysi ayaa ogaatay in Shirkad gaar ah lagu wareejiyay tasdiiqinta documiintiyada ay u baahan yihiin muwaadiniinta Soomaaliyeed ee gudaha iyo dibadda dalka.
Tasdiiqinta ama xaqiijinta dukumiintiyada oo ka mid ah shaqooyinka ugu badan ee dadka Soomaaliyeed iyo ganacsatadu ay uga baahdaan Wasaaradda Arrimaha Dibadda ayaa qiimaheeda aad loo kordhiyey kaddib markii lagu wareejiyey Shirkad ay saami wadaag ku yihiin Wasiirka Wasaaradda Arrimaha Dibadda.
Shirkad loogu magac daray TASDIIQ DOCUMENTS AUTHENTICATION SOLUTIONS ayaa lagu wareejiyey shaqadii Waaxda Qunsuliyadaha oo u xilsaarnayd caddeynta iyo ansixinta heshiisyada ganacsiga, guurka, furriinka, shahaadooyinka waxbarashada, shatiyada iyo caddeymaha sharciga ah.
Warqad lacag qabasho ah oo ay Isbahaysi aragtay ayaa muujinaysa in la kodhiyey wax ka badan 100% khidmadihii hore, tusaale ahaan, warqadihii lagu tasdiiqin jiray 20-ka doolar haatan waxaa la qaadayaa 45 Dollars, taas oo ay qebsanayaan shirkadda iyo saamileyda.
Sababta ugu wayan ee loo dedejiyey qandaraaskan ayaa ah in la dhaqan geliyo ka hor furitaanka kalfadhiga Baarlamaanka si aysan su’aalo uga keenin gudiyada ku shaqada leh meel marinta arrintan.
Qiimihii hore iyo qiimaha cusub
- Dhaladhada: 20 Doolar. Waxaa laga dhigay 45 Doolar
- Wakaaladaha dibadda: 20 Doolar Waxaa laga dhigay 70 Doolar.
- Waraaqaha degmooyinka: 20 Doolar. Waxaa laga dhigay 45 Doolar.
Khatarta ka dhalankarta qandaraaskan cusub.
1. xogta muwaadiniinta oo gelaysa gacan private ah taas oo isugu jirta hantida qofku leeyahay, shirkadaha u diiwaan gashan, warqadaha rasmiga ah ee lahaanshaha dhulka IWM.
2. Daahitaan ku yimaada adeeggii muwaadinka loo qaban lahaa maadaama shirkadda xaqiijinta samaynaysa ay tahay mid gaar loo leeyahay oo ay adagtahay inay qunsuliyadaha dibaddu si sahlan ula shaqeeyaan.
3. Qarash dheeraad ah oo ku kordhaya muwaadiniinta tasdiiqa samaysanaya maadaama marka uu lacagtii dowladda ku soo shubo Maaliyadda haddana laga rabo adeeg dheeraad ah.
