Jidda (Isbahasi) – Wasiirka Wasaaradda Arrimaha Dibadda Soomaaliya Axmed Macallim Fiqi oo adeegsanaya awoodda dowladnimada ayaa markii ugu horreysay si bareer ah u soo faro-geliyey kiiska Marxuumad Luul Cabdicasiis Maxamed oo Muqdisho lagu gubay.
Wasiirka oo ka mid ah xubno ka tirsan Xukuumadda oo dadaal ku bixinaya in la laalo xukunka dilka toogashada ah ee Maxkamadda Darajada 1-aad iyo tan Racfaanka Gobolka Banaadir ay ku xukumeen Sayid Cali ayaa amray Qunsuliyadda Soomaaliyeed ee Jidda in warqad laga soo qoro Awoowaha caruurta ay ka tagtay Marxuum Luul.
Warqaddan oo ay heshay Shabakadda Isbahaysi oo dhanka Qunsuliyadda Jidda uu Kiiskan abaabulkiisa ku lug lahaa Qunsulka Guudka ee Safaaradda Jidda oo lagu magacaabo Macruuf kuna beel ah eedaysane Sayid Cali, ayaa lagu sheegay in Awoowe Maxames Cabdullaahi Warsame oo dhalay Aabaha carruurta ay ka tagtay Luul uu go’aansaday in diyo uu u qaado carruurta 6-da ah ee ay ka tagtay Marxuumaddu, kuwaas oo marar badan ka soo muuqday fadhiyada Maxkamadda.
Lama yaqaan waxa ay warqaddaani ku soo kordhin karto kiiska ka dhanka ah Sayid Cali oo labo Maxkamadood ay dil toogasho ku xukumeen, haddana fara-gelinta qaawan ee xubno ka tirsan Golaha Fulint ay ku hayaan kiiskan ayaa walaac ku abuuraya geeddi socodka caddaaladeed ee qoyska Luul oo ku adkaysanaya in loo qisaaso ninka nolasha ku gubay gabadhooda.
Dhammaad
