(Isbahaysi, Muqdisho) Warbaahinta Isbahaysi ayaa ogaatay in dalka Cuba uu soo aqbalay safiir si qarsoodi ah uu Wasiiru Dowlaha – ahaana ku simaha Wasiirka Arrimaha Dibadda Soomaaliya – Cali Balcad u magacaabay bishii 3-aad ee sanadkan. Waxaana loo magacaabay Amb. Omar Maxamuud Dufle oo Wasiiru Dowlaha ay qaraabo dhow iyo xidid labadaba yihiin.
Arrinta walaaca weyn abuurtay ee Soomaali badan iyo wadamada Galbeedka ka caraysiisay ayaa ah, in Dowladda Soomaaliya aysan safaarad shaqaysa ku lahayn dalalka Scandinavian-ka ( Sweden, Norway, Denmark, Finland) oo Soomaali fara badan ku noolyihiin, iyadoo dowladdu aysan weli ku guulaysan inay hawlgeliso Diblumaasiyiin loo diray Sweden oo la rabay in laga furo safaarad wakhti fog.
Dhinaca kale, Wasaaradda Arrimaha Dibadda XFS ayaa soo xirtay safaaraddii Soomaaliya ee Canada oo ay ku noolyihiin dhowr boqol oo kun oo Soomaali ah oo qaarkood sharciyadu uga xanibanyihiin in la waayay safaarad caddaysa inay Soomaali yihiin.
“Ma jirto jaaliyad Soomaaliyeed oo ku dhaqan dalka Cuba! Sadex arday oo Soomaali ah oo mid ka mid ahi bishan June ay dalka ku soo laaban doonto, marka ay jaamacadda dhamayso ayaan ku soo arkay dalka Cuba” ayuu yiri Agaasimaha Isbahaysi oo bishii September ee sanadkii hore booqday dalka Cuba.
Hadaba in safiir loo magacaabo dalka Cuba, oo aan Soomaaliya wax Istiraatiijiyad ah ugu fadhiyin, sidoo kale laga tago dalalkii muhiimka ahaa ee wadamada Galbeedka ee Soomaalida badan ku noolayd waxay abuurtay walaac ay wadamada reer Galbeedku u arkeen inaanay Soomaaliya qiimaynayn xiriirka iyo saaxiibtinimada kala dhaxeeya, waana midda cadhada abuurtay.
Cuba ayaa todobaadkii la soo dhaafay martigelisay maraakiib iyo gujisyo Ruushku leeyahay oo qaarkood Nuclearka-ka xanbaaraan, kuwaas oo carbis wada jir ah samaynayay, waxaana la ogyahay Wasiiru Dowlaha magacaabay danjiraha Cuba inuu haysto dhalashada Maraykanka.
Wasiiru dowlaha Wasaaradda waxaa u dhaxday oo uu qabaa Amb. Omar Dufle oo Cuba loo magacaabay walaashiis, iyadoo dhinaca kale Madaxweyne Xasan Sheekh Maxamuud uu isna nin kale oo isla reerka Amb. Dufle ah u magacaabay safiirka Soomaaliya ee Washington, taasoo ka soo horjeeda qaabka ay Soomaalidu wax ku qaybsato ee 4.5 ka ku dhisan.
