(MUQDISHO, ISBAHAYSI) Shacabka Soomaaliyeed ayaa caro xooggan ka muujiyay markii baraha Bulshada lagu arkay Wasiiru Dowlaha Arrimaha Dibadda XFS Cali Balcad oo hal saac gudaheed sadex jeer dib u daabacay qoraalo uu sii daayay xafiiska Raisul Wasaaraha Ethiopia Aby Ahmed.
Qoraalada uu wasiiru dowluhu dib u daabacay ayaa ahaa hadallo ku jiray khudbaddii Raisul Wasaaraha Ethiopian oo mar kale ku celiyay damacooda waalid ah ee ku aaddan badaha Soomaaliya.
Wasiir Cali Balcad ayaa hadallada uu dib u daabacay ee damaca Ethiopia ku dul-qoray faalo loo arkay inay aad uga hoosayso fikirka gurracan ee Ethiopia, halka qoraalkiisa qaar ka mid ah loo arkay inuu la fikiryahay Raisul Wasaaraha Ethiopia.
Dhinaca kale Shabakadda Warbaahinta Isbahaysi, ayaa ogaatay in Wasiiru Dowlaha Arrimaha Dibadda XFS Cali Balcad uu ka aragti duwanaa wafdiga Soomaaliya shirkii todobaadkan labada dal ku dhex maray Ankara.
Wasiir Cali Balcad ayaa qabay fikir ahaan, in shir fool ka fool ah lala yeesho wafdiga Ethiopia oo waxa uu ugu yeeray caadifadda meesha laga saaro, labada dalna walaalo noqdaan oo gacanta la is qabsado, halka xubnaha kale ee wafdigu ay diideen, waxaana markii danbe xubnaha wafdiga soo kala dhex galay Madaxweyne Xasan Sheekh oo ku qanciyay Cali Balcad inuu madaxa wafdiga oo ahaa Wasiir Fiqi uga danbeeyo afkaarta dowladda.
Labo todobaad ka hor ayay ahayd markii Isbahaysi ay baahisay magacaabid qarsoodi ahayd oo wasiir Cali Balcad uu safiir ugu diray Dalka Cuba oo Madaxweyne Xasan Sheekh ay su’aalo badan ka waydiiyeen wadamada reer Galbeedka, qaarkoodna ay ku hanjabeen inay kaalmada jarayaan.
