(Isbahaysi- Muqdisho) Xildhibaannada ka soo jeeda Puntland iyo Soomaaliland oo door weyn ku lahaa dib u doorashada Madaxwaweyne Xasan Sheekh ayaa haatan u muuqda kuwo quus ka taagan dowladdiisa, kaddib markii ay ku guul darreysteen in ay ka furdaamiyaan gabdhaha Xildhibaannada ah ee ka soo jeeda deegaannadooda oo uu hor istaagay Madaxweyanuhu in ay magaca Soomaaliya ku matalaan fagaareyaasha Afrika iyo Caalamka.
Madaxweyne Xasan Sheekh Maxamuud, ayaa wajahaya dhaleecayn weyn oo ku saabsan in uu ka hor istaagay haweenaydii Labaad ee Soomaaliyeed in ay tartanto xil caalami ah.
Xildhibaan Fowsiyo Xaaji Aadan iyo Xildhibaan Marwo Bashiir, oo labaduba haystay fursado waaweyn oo ay ku guuleysan kareen ayaa la kulmay caqabado siyaasadeed iyo maamul oo Madaxweynuhu uu kaga hor istaagay hankooda matalaadda Soomaaliya.
Xildhibaan Fowsiyo Xaaji Aadan, oo hore u soo noqotay Wasiirka Arrimaha Dibadda iyo Ra’iisul Wasaare Ku-xigeenka Soomaaliya, ayaa doonaysay in ay u tartanto kursiga Guddoomiyaha Baarlamaanka Afrika, balse shir Jaraa’id oo ay Muqdisho ku qabatay ayey ku caddaysay in Madaxweyne Xasan Sheekh uu si bareer ah u diiday in ay tartankaas gasho, isagoo u sheegay in uu Jabuuti u tanaasulay, codka Soomaaliyana la siinayo.
Sidoo kale, Xildhibaan Marwo Bashiir, oo ka soo jeedda Puntland, ayaa dhammadkii sannadkii tagay waxaa hankeedii dhabarka ka jabiyey Madaxweyne Xasan Sheekh iyo xukuumaddiisa, oo ka door biday musharax ka soo jeedda Tansaaniya.
Madaxwaynuhu in uu dalal shisheeye labo jeer ka door bido in gabdho Soomaaliyeed ay ku guuleystaan Guddoomiyaha Baarlamaanka Afrika iyo Caalamka ayaa dhaawacaysa rajada haweenka Soomaaliyeed ay ka qabeen siyaasadda iyo dowladnimada.
